المدرس والاربعين تلميذ

زي ما انتم عارفين واحنا حفظنا -كطلاب- ان اذكي طفل هوالطفل المصري لحد ما يخش الماسوف علي عمرة المدرسة
وزي ما هو معروف ان اغلب الي بيطفشوا من المدرسة يا اما بينحرفوا ويتحولوا لاطفال شوارع بعد الهروب الكبير من البيت
او بيتحول بيروح يتعلم صنعة ومش بعيد لو اشتغل بلية يخترع محرك احتراق داخلي بيشتغل بعصير القصب وطبعاً حيتحط علي الرف
عشان القصب غالي اليومين دول.

انا بقي الحمد لله ما دختلش مدرسة في مصر لكن دخلتها في مكان تاني العن الحمد لله واصبحت غبي بردو كالعادة يعني

انا كان نفسي اعرف ايه هي حكاية الغباء الي بيحل علي الطالب المصري بعد تعليمه وتتحول دماغة لمجزمة ؟

اه واحد حيقولي المناهج: انا حقوله لا ما اعتقدش ان المناهج حتفرق بالعكس المناهج كويسة جداً ومحتاجة تكون اصعب اساساً وبيتدوا يواكبوا العصر
لكنها كويسة كمناهج دراسية ياعني
يبقي العيب منين؟ من الطالب ولا المدرس ولا المدرسة والمناهج والجو ولا البيبسي ولا الطماطم ولا ايه !؟
يمكن عشان طريقة التدريس؟
اه والله احتمال
احنا هنا الي بيحصل كالاتي :
كتاب او مذكرات احفظها عن ظهر قلب
استفرغ-لا مؤاخذة يعني- كل ما حفظت في الورقة
تطلع عنتر زمانك ومتفوق كمان!
في تعليم اسهل من كدة

طب طالما التعليم سهل والعيال بتنجح بس المنهج قديم
يبقي اكيد المنهج بيتحمل وزر الغباء؟ لا مش للدرجة دي يعني
اي نعم منهج حجري لكن مش مسؤل عن غباء شعب كامل!

طب نشوف المدرسة؟
المدرسة بتكون غالباً مبني قديم متهالك او جديد بيبرق مافيش وسط بينهم
المدرسة بتتكون في المتوسط بين 5 فصول لحد 100 فصل
فيها حوش صغير بالنسبة للتتار الي في الفصول
وفي كل فصل قرابة 80 طالب بيغيب ربعهم طول النسة فبتكون الكثافة 50
الفصل اوضة 4*3
كل 3 طلاب في تخته
ويا سلام لو فيل هندي قاعد في التخته
تبقي سنة سودا عليك وعلي الي خلفوك

ولو طويل تبقي ليلة سودا بردو ليه؟
عشان حيقعدوك ورا مع حثالة الصف الدراسي
ولو حتي نظرك ضعيف
وتلاقي العيال الاغبياء الي بنضارات قاعدين الاول
رغم انهم بيشوفوا احسن مني بسبب التليسكوب الصغير الي لابسينة"طبعاً انا عرفت الحيلة دي وطلعت نضارة البسها في ال يوم :D "

طبعاً في ظل الظروف دي بيلجأ المدرس للكروتة ولو في حصة كمبيوتر فالطلاب مش حيشوفو شكل الكمبيوتر طول السنة
والي ما عندوش كمبيوتر حيعتبره خياااال علمي مش اكتر

في ظل الظروف السودا دي حيكون كل الطلبة مش بيفهموا وبالتالي حياخدوا دروس
الي معاه يتعلم طبعاً والي ممعاهوش في ظلمات يعمهون!
يجيي الطالب يشوف الدروس حيلاقي الاسعار بين 60 الي 300 جنية علي حسب المدرس
طبعاً في الاول حسترخص يلاقي في الدرس معاه 40 نفر
وبردو ما يفهمش
ما عملناش حاجة يعني فرقت 50 من 40
يجيي يشترك في ابو 300 يلاقيهانفس  الحكاية بردو
الله يا جماعة طب المشكلة فين ؟
اه اكيد المشكلة في الطماطم المسرطنة الي بياكلها الطلاب طول حياتهم
سواء في الشاي او في القهوة او في عصير الفراولة المغشوش او في طبيخ الست الوالدة


يبقي لازم نقاطع الطماطم


وكمساهمة مني في حملة مقاطعة الطماطم
لازم نفتخر بشباب مصر الذي لا يأكل الطماطم



هذا ولا حول ولا قوة الا بالله
ويخرب بيت مجانية التعليم الي جابت امثالكم
ويلا قوم منك له افتح لك كتاب ولا اي نيلة
بدل قعدتك دي علي الانترنت